الخصوصية
كاسكال ياخذ أقل ما يحتاجه حتى يوصلك. ما يبيع بياناتك، وما يسوي عنك ملف إعلاني.
آخر تحديث: تشرين الثاني 2026
باختصار
حسابك
تسجل بحساب Google أو فيسبوك. من Google ناخذ اسمك وإيميلك. من فيسبوك ناخذ اسمك وإيميلك وصورتك، وتاريخ ميلادك إذا وافقت عليه. ما نشوف كلمة السر مالتك، وما ننشر شي بحسابك. إذا ربطت رقم هاتفك نحفظه، ونرسلك عليه رمز التحقق بس.
ملفك الشخصي
اسمك وصورتك واسم المستخدم يشوفهم أهلك وأصدقاؤك بالتطبيق. تاريخ ميلادك وحساباتك بانستگرام وفيسبوك تنحفظ بحسابك وما تطلع لأحد. تگدر تغيّر أو تمسح أي واحد منهم من «ملفي الشخصي».
موقعك
نستعمل موقعك حتى نبيّنك على الخريطة، نحسب المسار، وننبهك على الطريق. اللي ينحفظ بالسيرفر: السفرات اللي تخلّصها (وتگدر تمسح أي وحدة منها)، وسرعة الطريق بدون اسمك إذا مفعّل «شارك سرعة الطريق». هذي السرعة ما تنربط بحسابك.
العائلة والأصدقاء
موقعك يوصل بس للي انت تعرف إنهم يشوفوه: عائلتك حسب الإعداد اللي ينعرض عليك قبل ما تنضم، أو صديق انت بديت وياه مشاركة مباشرة. إذا المشاركة شغّالة والتطبيق مو مفتوح يطلع إشعار ثابت يگول إن موقعك ينشاف. تگدر توقف المشاركة أو تطلع من العائلة بأي وقت.
الرسائل
النصوص، الرسائل الصوتية، والأماكن اللي تدزها تنحفظ بسيرفرنا حتى توصل للطرف الثاني. محد غير أطراف المحادثة يشوفها.
البلاغات والأماكن والتقييمات
بلاغات الطريق تنشاف من السواق القريبين بدون اسمك. الأماكن اللي تضيفها وتقييماتك تنراجع وتنعرض للكل.
المايكروفون
ينفتح بس من تضغط زر التسجيل برسالة صوتية. البحث بالصوت يمر بخدمة الكلام مال تلفونك، مو بسيرفرنا.
الأغاني
كاسكال يعرف من أندرويد إذا اكو صوت يشتغل، ويدز أزرار التوقف والتالي لتطبيق الأغاني. اسم الأغنية وصورتها ما تطلع إلا إذا انت ربطت تطبيقات الأغاني من إعدادات أندرويد. ما نقرأ إشعاراتك، وما ندز شي من هذا لأي سيرفر.
الإعلانات
نحسب كم مرة انعرض الإعلان وكم مرة انضغط. ما نسوي ملف إعلاني عنك وما نبيع بياناتك لأحد.
الإشعارات
حتى توصلك الإشعارات نحفظ رمز جهازك عند خدمة الإشعارات مال Google.
وين تنحفظ وشگد تبقى
بياناتك على سيرفر كاسكال. موقعك المباشر يبقى خمس دقايق بس. نسخ الاحتياط مال السيرفر تنمسح وحدها بعد 14 يوم.
حذف بياناتك
من «حسابي» انزل لآخر الصفحة واضغط «احذف الحساب». ينمسح بنفس اللحظة: اسمك وإيميلك ورقمك وصورتك وملفك، سفراتك، أماكنك المحفوظة، سياراتك، رسائلك وتسجيلاتك الصوتية، عائلتك وأصدقاؤك. اللي ضفته للخريطة (أماكن وتقييمات) يبقى بدون اسمك.
تواصل ويانا
من داخل التطبيق: «حسابي» ثم «تواصل ويانا».